BLOG PRIBADI HENDRIK MAMARODIA
Buah pikiran orang muda...Hanya sebuah coretan yang menyenangkan...

Jumat, 05 Februari 2016

Filled Under:

Saki Kapala itu Musti Menghasilkan!

Kalo libur, biasa orang jalan-jalan, pigi pa sebe ato ajus pe kampung, ada tamang laeng bakti sosial (ini super skali), ada yang cari kerja for tambah-tambah beli smartphone baru, ada yang jaga warong dengan banyak le.

mar pa kita ini sadiki laeng, mar yang kita tau ada no tu orang-orang macam kita, yang kalau libur itu dimuka komputer (kadang-kadang jaga warong kalo sebe deng ajus kaluar). Paling ada yang bingo, baapa ng? libur kong dimuka komputer turus. Nah biasa orang kalo dimuka komputer bauni, mar tetap bauni mo pastiu, dengar lagu, musti noh mar masa cuman dengar lagu, tetap pastiu le.

Nah ada tu ng mo beking dimuka komputer mar nda mo pastiu, yang mo pastiu sebe deng ajus karena ng cmn kaluar kamar kalo mo makang :D hahah.
Eksperimen,sebenarnya eksperimen pe arti lebeh luas dari yang kita jaga beking-beking, mar kita memang suka pake kata eksperimen.

Nah karena kita anak manajemen mar latar belakang anak teknik jadi, kebiasaan anak teknik nda mo talapas dari pa kita. Latar belakang anak TKJ beking kita sering bantu tamang-tamang kalo dorang ada masalah deng dorang pe laptop ato sejenisnya. Nah kita kan so biasa jga beking-beking bagitu waktu masih di CSC (biar nda jago sama skali).

Hah jadi teknik-teknik yang kita pake, sadiki banyak berasal dari toko, yang ko' fery (Murni Computer), ka' sem deng ka' stany (CSC) da kase ajar. Mar kalo ka' stany pe pelajaran somo amper-amper ilang, soalnya nda talalu banyak kita da belajar tu mesin cetak, kong so kadang skali jaga kore-kore sampe skarang.

Dari install, cloning, networking, troubleshoting, bongkar-pasang samua dari pa dorang. Makase banyak guru-guru saya Tuhan Yesus selalu memberkati. Nah bale di tu tadi kita bilang eksperimen maksudnya kita m cari tau cara baru yang lebih efektif dan efisien tentang bagaimana kita melakukan tu pekerjaan-pekerjaan rutin sama dengan bainstall dll, disamping itu mempelajari hal-hal baru yang sebenarnya so lama (maksudnya baru mo belajar akang)

Sekitar 1 tahun lalu kita mulai jaga beking ini, kita dapa tu cara bainstall lewat jaringan (yang so tau jangan terek neh), bagemana mo install linux, kong kita so mulai biasakan diri dilingkungan linux.
Nah torang mulai maso di pokok pembahasan.
menghasilkan
credit: www.erfolgreich-im-leben.com

Ngo taru kira neh, itu cara bainstall dari jaringan, nda talalu susah da beking apalagi ada tutorial, serta so jadi, kita rasa bermanfaat, berapa kali kita da pake tu cara, dan bisa menghemat waktu dan energi :D ngo kira nda lelah tiap bainstall beking flashboot, kong nda da dia p harddisk le bagini. Nah itu dia pe nama menghasilkan!

Berikut bermain-main dengan linux, sistem operasi gratis terbuka yang dia p potensi dimasa depan besar skali, cukup bagus. Ngo kira kalau ngo cuman biasa install windows kong ngo mo haga tu pembuatan partisi dilinux saat bainstall, nda jaga beking gugup, salah babat raib tu dokumen skali deng bokep :V.
Ada install ni linux kita jadi baca banyak tentang bootloader.
nah meskipun belum dapa lia, kita rasa itu cukup menghasilkan

Libur kali ini, kita da pake lebeh banyak dengan isi blog (bermanfaat dan menghasilkan), selain itu ada tu satu barang yang kita da beking sampe saki-saki tu ontak mar nda jadi-jadi, itu mo install mac pa DAISY (kita pe lotep).
Dah so tadampar kasana kamari nda jadi-jadi.
Ini dia yang musti dipertanyakan lebih jauh, bahkan jika dia jadi kita so menghabiskan cukup banyak sumber daya (pemikiran, kuota dll) bae leh kita so donlot memang dia p image. Noh kong ini nda jadi. Yang kita sadari disini adalah kita so saki kapala di barang yang sebenarnya nda talalu penting.

Mac yang pake sadiki, cuman orang-orang elit. Dia pe potensi yahh, bagemana e, lebeh bae belajar windows. Meskipun begitu kita le sadar kalau for orang yang hobi dia nda m tapikir sama deng kita, karena apa? yang dia nikmati itu prosesnya!

Tapi yang kita mo tekankan disini kwa bagemana mo pilih tu sesuatu yang ng mo belajar akang, di dunia ini itu ilmu banyak skali, kita le suka belajar banyak mar so nda m cukup tu umur mo belajar smua yang ada didunia ini, jadi ngo pilih yang mana yang akan berpengruh pa ngo p kehidupan, kalo katu ngo itu memang pakar mac, berarti so disitu ng pe tampa, mar kalo nga di bidang laeng kong cuman jaga saki kapala di nyanda, padahal so boleh belajar hal laeng, sama deng marketing, keuangan, manajemen, hukum (sadiki-sadiki), kalau om MiTu bilang belajar menyukai yang penting!. Hal besar to itu dibandingkan dengan install mac sapaya ng p laptop dapa lia gaga (so celah diri sandiri ini) :D wkwkwk

Kita da tasadar waktu da ba chat dng Bill, waktu kita bilang kita da beking mac nda jadi-jadi, kong dia bilang: sudah jo, ada hal yang lebih penting yang musti ng belajar,
kita tanya: apa itu,
kong dia jawab: sesuatu yang menghasilkan uang. mo install itu mac paling kwa cuman gengsi-gengsian mo kse tunjung pa tamang.

Memang jago! langsung no kita sadar, kng kita bilang: "io no so saki kapala, saki-saki di nyanda".
Nah dan akhirnya semoga ngo tamang-tamang boleh memetik pelajaran dari kita pe kisah yang amper taputar-putar ini. Bahwa dalam melakukan sesuatu kita harus menghasilkan sesuatu yang positif.

Nanti no ngo pikir sandiri apa tu yang ngo da beking, menghasilkan nda?
kita belajar hacking, menghasilkan nda?
kita belajar ini, itu menghasilkan nda?

Itu dia cuman kita p contoh kecil, sekali lagi semoga menginspirasi :D
Mar inga nda selalu musti menghasilkan uang, yang penting menghasilkan, dia p ideal memuaskan diri sendiri dan orang lain. yang penting menghasilkan!, apa katu lagi jaga bilang itu, oh io PRODUKTIV.

0 komentar:

Posting Komentar